14 anyos naghikog sa kwarto patay

   Patay ang usa ka 14 anyos nga dalagita human kining maghikog sulod mismo sa ilang panimalay kagahapong adlawa.

   Ang biktima itago lang sa pangalan nga alyas Jenny, 14, residenti sa Barangay Landan Polomolok, South Cotabato, magtutungha sa Landan National High School Polomolok South Cotabato. 

   Matud pa sa amahan niining si George Aquino nga nakita pa sa iyahang manghod ang biktima una kini nagpakamatay apan milabay ang pipila ka minuto nakit-an na lamang kining nagbitay sa sulod sa ilahang kwarto.

   Nangayo og tabang ang igsuon ngadto sa mga silingan aron matangtang ang pisi sa liog niini, apan wala nay kinabuhi ang nahisgutan. 

   Sumala ni Police Supt. Jeody Lito Guisinga ang Chief Of Police sa Polomolok Police Station nga padayon pa nilang ginaimbestigahan ang maong panghitabo human sila makakita ug suicide note sa biktima nga nagkanayon nga dili niini madawat ang pagmarka sa iyahang maestro nga absent kini sulod sa usa ka semana bisan pa man nga nagasulod kini sa klase.

   Sa pagkakaron nagsubo ang mga klasmyt sa biktima sa kalit niining pagkamatay. (TAS)